يارب ارحم وطن عليه الدموع  بتسيل
والناس بتتخبط هنا وهناك شمال ويمين
الفقر والجهل والتعصب والمرض والآلم
تنكتب عليه اشعار وتتغنى عليه مواويل
وبدل ما الصعاب تجمعنا بقت تفرقنا،
وباسم الديمقراطية بقينا نتقتل تقتيل
ولا رئيس نافع و لا مرؤوس عليه تعويل
ولا حكيم بنصغى لكلامه والعظيم بقى بيميل
يابلدى قلبي بينزف دم وبيبكى عليكى النيل
وثورتك عورة ومخطوفه ودم برئ بيسيل
عيونا مرفوعة وبتصلى احرس يارب وشيل
بلد التاريخ والحضارة سمعتها فى سواد النيل
نهارها مظلم وفيه صراع وليلها طويل، طويل
بقينا نتخبط واقتصادنا بينهار وكله بقى تمثيل
 واللي يكفر التاني ويقول عليه دا بهلوان فى الليل
اللى فى ايده السلطة بقت سلطه وعايزه تتبيل
والقضاء بقى قدر  وتاه منا النور والدليل
والتعليم تلقين وتخلفنا عن الامم فى الذيل
وبقينا بنرجع للوراء وبقينا بلد كله عليل
والمرض ينهش الكلى والقلوب وشفنا الويل
والفقر عجزنا وبنعانى ضنك ملهوش مثيل
مش بنعانى الجوع وعدم الامان وكفاية،
دا الوطن فى خطر وحيطة البيت بتقع وتميل
يا بلدي اصحى وفوقى وتخطى ظلام الليل
يا مسئول فوق ومتخليش حملك علينا ثقيل
ويا رجال البلد بتخرب ودى لازم نشيلها شيل
ادو العيش لخبازه والدستور ليه رجال قانون
مش كل من هب ودب بقى علينا خبير ودليل
وخلو القانون يسود مش غابه اسود ولا تمثيل
وارحمونا  بقى او ترحلوا دا انتو هديتو الحيل
يا بلادي لمى اولادك دا مشوارنا لسه طويل
يا اهلى تعالوا الى كلمة سوا بلاش الفرقة والتأويل
نبنى الحضارة ونبقوا بين الامم منارة فى الليل
يا بلدي ضاعت سنين العمر وبقينا بدل ما نتقدم
نرجع سنين للوراء ولو مفقناش هنعانى الويل
.صلوا عشان مصر تعبر ازماتها وتشد الحيل