عجبي عليك يا ابن آدم يا كبير الدار
قومت الدنيا وماقعدت لما قالو حمار
هو اسمى شتيمه ولا جنسي ده عار
خلقنى ربي وخلقك ولا حدش ليه خيَار
وانا مهما زاد الحمل فوقي صابر على المشوار
لا في يوم أقول أشمعنى أخويا وآخد منه تار
ولا يوم أبص لرزق غيري وأطق منه وأغار
ولا أرفع في يوم عيني على جارتي وأصون الجار
ولامهر أدفع لحمارتي وشبكة وسوار
ولا شقه أجمع في تمنها ولا أجهز دار
ولا حرمي حامل تتوحم عايزه الكافيار
ولا بنت تخرج عن طوعي وتجيب العار
ولا ابن يدمن ويهلوس ويقع ينهار
عايش في حالي متهنى وليه أفكار؟
باكل وباشرب وأنهق و مافيش أسرار
وعندي ابن آدم يخدمني ليل ويانهار
ان جعت يشتري أكلي بأغلى الاسعار
وفي مرضي يفضل يعالجني ويدعي الستار
خادم أمين من غير راتب ولا حتى إيجار
والحين عرفت يابني آدم
مين فينا حمار؟؟
ليست هناك تعليقات:
إرسال تعليق